IND vs NZ Final : रोहित शर्माचा धडाकेबाज निर्णय? टीम इंडियाच्या प्लेइंग इलेव्हनमध्ये मोठा बदल होणार!

NewsZenn Mar 8, 2025 476 0

Rishabh Pant May Replace KL Rahul : भारत आणि न्यूझीलंडमध्ये होणाऱ्या चॅम्पियन्स ट्रॉफीच्या अंतिम सामन्यासाठी रोहित शर्मा एक मोठा निर्णय घेण्याच्या तयारीत आहे. फायनलसाठी टीम इंडियाच्या प्लेइंग इलेव्हनमध्ये बदल होण्याची शक्यता असून, गौतम गंभीरचा 'हुकमी एक्का' थेट अंतिम सामन्यात मैदानात उतरणार असल्याची चर्चा रंगली आहे.

भारताला अजून एक विजय हवा!
चॅम्पियन्स ट्रॉफीचा अंतिम सामना 9 मार्च रोजी दुबई आंतरराष्ट्रीय क्रिकेट स्टेडियमवर खेळवला जाणार आहे. आतापर्यंतच्या दमदार कामगिरीमुळे टीम इंडिया विजेतेपदाच्या उंबरठ्यावर आहे. मात्र, न्यूझीलंडविरुद्धचा सामना सोपा नसेल, असे तज्ज्ञांचे मत आहे. त्यामुळेच रोहित शर्मा एक मोठा निर्णय घेण्याच्या तयारीत आहे.

न्यूझीलंडच्या फिरकी गोलंदाजांचा टीम इंडियाला धोका?
न्यूझीलंडने साऊथ अफ्रिकेविरुद्धच्या सेमीफायनलमध्ये दमदार गोलंदाजी करत विजय मिळवला. विशेषतः फिरकीपटू मिचेल सँटनर आणि रचिन रविंद्र यांनी प्रभावी गोलंदाजी करत आफ्रिकन फलंदाजांना अक्षरशः अडचणीत आणले. न्यूझीलंडच्या या फिरकी जोडीचा सामना भारतीय संघासाठी देखील मोठे आव्हान ठरू शकते.

भारतीय संघात डावखुऱ्या फलंदाजाची उणीव?
भारतीय संघात बहुतांश उजव्या हाताने खेळणारे फलंदाज आहेत. अक्षर पटेल हा सहाव्या क्रमांकावर फलंदाजीसाठी येतो, पण टॉप ऑर्डरमध्ये एकही डावखुरा फलंदाज नसल्याने न्यूझीलंडच्या फिरकीपटूंना फायनलमध्ये मोठा फायदा होऊ शकतो.

ऋषभ पंत फायनलमध्ये खेळणार?
या सर्व परिस्थितीचा विचार करता, भारतीय संघ व्यवस्थापन ऋषभ पंतला अंतिम सामन्यात खेळवण्याच्या तयारीत आहे. ऋषभ पंत डावखुरा फलंदाज असल्याने तो सँटनर आणि रचिनच्या फिरकी गोलंदाजीचा प्रभाव कमी करू शकतो.

यंदाच्या चॅम्पियन्स ट्रॉफीमध्ये ऋषभ पंतला एकही सामना खेळण्याची संधी मिळालेली नाही. मात्र, अंतिम सामन्यात त्याला केएल राहुलच्या जागी संधी मिळण्याची शक्यता आहे. जर भारतीय संघाने हा बदल केला, तर फायनलमध्ये हा निर्णय निर्णायक ठरू शकतो.